Day 4 (23-7-2008) -- 台北

Day 4 (23-7-2008) -- 台北

今朝早去左"101購物中心"參觀, 上次黎無上頂樓參觀, 今次終於上到黎喇!! 搭Lift由地面上到101樓, 真係勁快, 中間真係要吞幾次口水先減到d耳壓.

呢度有免費借用耳機, 自選語言去收聽介紹, 但呢個耳機既設計好鬼使特別, 成個電話聽筒咁.... 好潮呀!!

 

之後, 我地出發去食豆腐 --> "深坑豆腐街", 因為啱啱食完午飯, 個肚仲好飽, 所以我地並無食出名既臭豆腐, 只係各自食左碗豆腐花就算! 坦白講, 小妹比較喜歡香港式既山水豆腐花lor, 台灣個d..... 算把啦!

 

"九份", 我又黎喇!! 上次好晏黎, 有d舖頭已經"山"左門, 今次晏晝黎, 大把野睇!! 可惜, 真係'熱使肋肋', 仲邊有mood呀....

 

跟住我地去左"士林官邸公園", 落車位置旁邊有棵<連理樹>, 某人一邊幫我同mpp影相, 一邊講百年好心, 嘻嘻~~~ 又幾啱聽喎.. 

夜晚去左行"西門町", 小妹盡最後努力, 要買齊d手信比公司班姊姊, 而mpp呢個書痴, 佢梗係唔會放過最後一激, 我地千辛萬苦行左好多路去到mpp既"誠品", 呢個傻佬又買書, 比起佢係書展買既書, 係台灣買六本, 應該算你濕濕碎, 哈哈....

Day 3 (22-7-2008) -- 台中 --&gt; 台北

Day 3 (22-7-2008) -- 台中 --> 台北

又係倒塔早起身, 因為今朝一早要搭高鐵, 呢條高鐵時速高達300公里, 只需一個鐘頭多dd就由可以從台中到達台北喇, 比行車時間快超過一個鐘頭gar!  不過, 小妹覺得雖然話咁快就到, 但高鐵既車速, 好似唔夠上海既"磁浮鐵"快喎....

好嘢!! 我地終於到達台北喇!!!

 

首站去左"民主紀念館", 呢度既建築物用左好多梅花圖案設計, 睇真d, 又幾靚喎! (特別嗚謝mpp提醒, 小妹又有烏龍野, 將梅花誤寫成櫻花, 哈哈...)

 

之後, 我地去左"忠烈祠"參觀, 哇)))))))))) 勁哂呀)))))))) 唔掂! 唔掂! 拿拿聲影完相即閃.....  小妹真係"鄧"d軍人慘, 大熱天時, 著哂軍服, 全身出哂汗, 哂到燶, 真係好易中暑, 可憐!! 真係當兵唔容易!!! 

跟住, 我地去埋"故宮博物館" + "美麗華"參觀, 又行左好多好多路, 今日我對腳又要宣佈certify.... >.<

好!! 時間啱啱好!!  腳軟最啱就係浸溫泉 --> "春天溫泉", 呢個溫泉可以男女一齊浸, 一齊浸當然要著泳衣啦, 仲要加埋一個樣樣衰衰既浴帽, 唉.... 無計啦.....

呢度有好幾個不同特色既池, 有冷有熱, 任君選擇! 特別一提係玫瑰花辨池, 好浪漫既呢.... 當我同mpp落池後, 無人敢同我地一齊浸, 可能人地都唔好意思, 費事阻住我地鴛鴦戲水啦, 哈哈哈哈......

浸完溫泉, 都肚仔餓lu, 我地去左"士林夜市", 呢個夜市係小妹第二"飛佛"!!! 我當然有食我既至愛<豪大大雞排>, 雖然每次都要排隊, 但no problem!! 而mpp亦有番"卓"佢既至愛<七里香>  ---> 咦..... no way! 咪預我呀!!

Day 2 (21-7-2008) -- 高雄 --&gt; 台中

Day 2 (21-7-2008) -- 高雄 --> 台中

一早起身出發, 第一站去"孔雀園", 你睇!! 孔雀開屏呀)))))) (唔好意思, 有d低B....嘻嘻)

 

之後, 我地去食午飯, 順便欣賞埋"日月潭", 咦.....個湖真係名不虛傳, 都幾靚喎.... 隨後去埋旁邊既"文武廟"參觀.

跟住我地向"九族文化歡樂世界"出發..... D天氣真係熱到爆.... 又有蚊咬我, 嗚嗚嗚.......... 可憐既我, 今日唔係黎觀光, 而係黎餵蚊呀...... >.<

同mpp係入面玩左過山車同海盜船, 無膽既小妹, 嚇到瘋狂咁尖叫.... 可惡既mpp, 我係海盜船不斷叫喊時, 佢就不斷好變態咁笑我!!!!! 哎丫丫, 佢實在太可惡喇, 我當時真係驚到死gar.... 好在, 我都還以顏色, 佢隻右耳比我d叫聲, 都震到聾聾地...... 哈哈哈哈......

就係咁, 我地完結左係高雄愉快但熱爆既旅程, 跟住直往台中!!!!

台中既"逢甲夜市"係小妹同mpp既至愛, 我地買野買到停唔到手, 特別係mpp, 佢買野買到喪左, 要人催我地上車, 佢先急急腳走人.... 唉! mpp, 你失禮死我喇, 哈哈哈~~~~哈哈哈~~~~

特別一提, "春水堂"既珍珠奶茶, 大家有機會見到既話, 不妨一試!! (唔好記錯呀, 係春水堂", 唔係吹水堂呀, 哈哈....)

Day 1 (20-7-2008) -- 香港 --&gt; 高雄

Day 1 (20-7-2008) -- 香港 --> 高雄

我地一行十人, 倒塔咁早7:55就於香港機場集合, 由於搭十點機, 我地先係美心嘆個靚茶 (可惜機埸間美心完全唔掂, d冷氣都唔知走左去邊, 滴哂汗.....  """=.= """ ), 然後我地慢慢入閳, 仲有大把時間係上機前慢慢影相, hea吓d時間... 嘻嘻!

 <-- 我個姨甥女, 超可愛!!!!

 <-- 飛機餐都唔錯, 幾好味!!!

 

坐左一個鐘多dd既機程, 我地終於黎到高雄喇!!  哇哇))) 天氣勁好呀, 陽光普照, 同天氣預測完全相反, We feel GoooooooooooooD, 哈哈.....

 

第一站, 就係去"佛光山", 山上風景, 佛像同埋建築物都好靚, 好宏偉, 但小妹實在太頂唔順d天氣, 加上小運動既我, 跟本唔夠力行d山路, 搞到mpp都要陪我慢慢行, 我地成日都做'包尾大將軍", 嘻嘻.......

 

跟住, 我地去左"春秋閣" --> "龍虎塔" --> "玄天上帝廟", 同埋去"愛河"遊船河.

 

夜晚, 我地去左行"六合夜市", 唔...... 我對呢個夜市麻麻地, 雖則佢好多野食, 但佢成條街直"白"nut咁, 有d女人街feel...... >.<

 

第一日全部以觀光為主, 可能太熱關係, 個人無嘜mood, 覺得d行程有d悶..... 行左實在好多好多路, 差d係第一日對甲組腳就要宣佈certify ..... @_@ 

 

蝙蝠俠 - 黑夜之神 &lt;The Dark Knight&gt;

星期六同mpp係數碼港睇左蝙蝠俠 - 黑夜之神, 小妹一向覺得batman係男仔戲, 所以對呢套並無太大期望.

上次除夕晚去數碼港睇戲, 真係大把位任你坐!! 但上星期六晚, 全間戲院簡直虛陷... 散埸時都幾壯觀gar, 十居其九都往同一方向攞車, 當中仲有唔少靚車就咁拍係路邊tim...

講番套戲, 唔知點解, 梗係覺得主角batman個樣奸奸地, 唔夠正氣! 對佢既感覺麻麻地, 但當batman架戰車變為一架電單車後, 小妹又突然覺得batman都幾ok喎, 有d亦正亦邪feel, 都幾型!! 哈哈....

 

查實小妹覺得, 呢套戲既主角唔係batman, 而係小丑!! 佢真係做到入型入格, 好鬼變態, 令小妹打哂冷震............ 演技非常出色!!

 

而值得一提係香港既景色, 雖然鏡頭唔多, 但拍得香港勁靚, 簡直係香港人既驕傲! 唯一唔好既..... 並唔係Edison只出現短短幾秒, 而係套戲拍得香港d警察唔係好smart, 有d stupid feel lor....... >.<

 

 

 

愛是不保留

最近, 睇過不同既blog, 發現大家不約而同, 都悼念緊一個叫Cindy既blog友, 佢不幸於日前, 因為癌病而離開大家, 返回天父既身邊.

從佢先生"天皇"係Cindy個blog度, 告知大家佢太太離開既消息, 以及其他blog友既文章及留言, 小妹確實感覺到個份"痛".......

http://hk.myblog.yahoo.com/cindy-marco/article?mid=27213

而其中有一個blog友, 有感而發寫左一句說話: "不要先學會可惜, 才懂得去珍惜!" 

呢句說話好有用!! 但人往往善忘, 雖知呢個道理, 但好快就回復本性....... 希望大家珍惜身邊既一切, 包括你身邊既家人 / 伴侶 / 朋友 / 甚至寵物!! 唔好等失去後, 先去後悔! 除左天父之外, 無人會知道聽日會係點, 我地應該珍惜自己而家擁有既所有野!!!

剛剛同mpp度過一個好有紀念既日子, 或許自己有所經歷.... 又或許自己年長左.... 小妹好珍惜同mpp一齊既每一分每一秒......

同mpp一齊唔算好耐, 但佢確實帶比我好多愛, 歡樂同希望!! 小妹自知自己比較小氣, 郁d唔埋就發吓顛, 成日差d將mpp激死..... 聰明既mpp好鬼醒, 有時會"反小氣"番我...... 所以我都幾醒目gar, 發完顛後, 我會死死地氣咁叫: "呀sir比次機會啦!"....  哈哈!!! 好低b, 但有時work, 有時唔work...... =.=""

多謝mpp你既包容同忍耐, 不過咁, 希望你仍然繼續包容同忍耐, 小妹會繼續努力改善!!! (查實我講左好耐話會改, 但係...... =.=" ...... 辛苦你喇mpp..... 哈哈哈哈......)

或者好多人唔會將"愛"呢個字放係咀邊, 但傻更更既我, 成日總會問mpp同一個問題: "你愛唔愛我??"  而mpp每次總會不厭其煩, 雖則有d機械式, 但好sure咁回答: "愛!!"  可能好多人覺得呢條問題好無聊, 好蠢.... 但我就係咁gar喇! 人生苦短呀, 想愛就愛, 想做就做吧!!! 

感謝主, 讓我走到您身邊!! I will always with you!!! (以上部份內容可能有d肉麻, 但由於mpp24小時長期監察住小妹呢個blog, 所以小妹要趁而家擦定鞋先!!! 請大家多多忍耐.... )

 

突然, 想起呢首歌......... "愛是不保留"

 

登登登登...

等左好耐既日子終於來臨喇!!!!

聽日..... 就係聽日......

 主角ready!!!!! 禮物ready!!!!

超期待呀!!!!!!!!!!!

 

今晚mpp book左一間酒店同我度過呢個好值得紀念既日子,

呢個傻佬已經安排好呢兩日既慶祝節目,

但我今日long week,

所以一陣我會即閃,

返屋企執拾好行裝就go go go............... yeah!!!

 

 

 

I&#39;m back!!

我返黎喇!!!!

出發前係香港check過天氣, 台灣成個星期既天氣預測係會有雷雨, 但我地係台灣咁多日, 一d雨都無不特止, 仲鬼咁陽光普照tim, we are so lucky!!!! YEAH.... YEAH....!!

唔知係咪黎緊星期六,日, 台灣會有一個颱風吹襲, 係台灣呢五日裡面, 小妹覺得天氣實在...實在....非常.....非常.....咁悶熱, 每日都有成35-36度!!! (但我個人認為應該有接近40度, 真係熱到痴肺, 攪到我成身都"痴痴立立", 而且仲哂黑左小小tim..... @_@ ) 加上小妹出名係一名懶人, 呢次行程成日都要行, 真係行到腳仔軟, 真係有d 辛苦!!

雖然爸爸媽咪最後都取消無一齊去, 係好可惜, 但真係好在佢地無去咋, 如果唔係, 我諗佢地一定會好辛苦.....  今次第一次同三哥去旅行, 加埋大家姐同二家姐一家人, 仲有我既mpp, 一行十人, 成個行程吃喝玩樂嘜都有, 大家都"反"得同買得好開心, 感覺好warm呀!!!

我地由高雄食到台中, 又由台中玩到台北, 晚晚都行夜市, 全程食食食...... 唉!!!! 我同mpp又肥左好多呀!!!!!!!!!!!!! S....................O.....................S.....................

肥豬靚相稍後送上, 嘻嘻.....

 

放假喇

聽日終於放假喇!!! Yeeeaaaaaaahhhhhhhhhhhhhhhhh!!!

擒晚已經執行李執得八八九九, 聽日早機, 要朝早六點幾起身, 如果今晚瞓到既話, 一定要早d瞓先得......

不過, 真係有d擔心台灣既天氣, 因為個邊啱啱打完風, 未來一星期應該都會落雨, ohhhhhhhh.....  希望天公造美啦..... (呢個時候, 小妹又要運用我d念力喇, 台灣好天~~ 台灣好天~~ 台灣好天~~.)

地區名稱	07/19 星期六	07/20 星期日	07/21 星期一	07/22 星期二	07/23 星期三	07/24 星期四	07/25 星期五
台北市	25~32°C	25~33°C	25~33°C	25~33°C	25~33°C	25~33°C	25~33°C
北部地區 (台北、桃園、新竹、苗栗)	25~32°C	25~33°C	25~33°C	25~33°C	25~33°C	25~33°C	25~33°C
中部地區 (台中、彰化、南投、雲林、嘉義)	24~31°C	24~32°C	24~33°C	24~33°C	24~33°C	24~33°C	24~33°C
南部地區 (台南、高雄、屏東)	24~30°C	24~32°C	25~33°C	25~33°C	25~33°C	25~33°C	25~33°C

低低地

今日心情super down... 因為發現準備下星期比mpp既神秘禮物, 同我所想既有d出入.....

查實係製作過程時, 都已經唔係幾順利... 點知最後大貨都只係一般, 同我期望既差咁一截!!! 由於mpp仲未知呢份禮物係乜東東, 我而家真係忍得好辛苦呀)))))))))) 今日更加super super down!!!!!

原本諗住準時六點即閃去攞禮物, 因為下星期要開始放假去旅行, 點知臨放工前個客突然send左d野要follow, 搞到我遲哂大到!!  返到屋企後, 我發現呢件禮物有d問題, 哇))))) 真係晴天霹靂!!!!!! 我已經花左好多心血gar喇!!! 天呀)))))))))))))點解你咁玩我呀!!!!!!!

不過咁, 小妹明白呢次可能係個考驗..... OK, 無問題!! 可幸既係, 我而家仲有剩d d 時間去修補, 最緊要係mpp鐘意就得喇!!!  呢份係周年禮物, 我真係諗左好耐gar喇, 而且呢份禮物, 真係一份好有紀念價值既禮物黎gar, 值得!! 值得!!  heehee

今次呢份小小禮物既經歷, 我覺得同做人一樣.... 曾幾何時, 我都成日係度埋怨個天... 我份人都ok丫, 點解要我受苦, 要我傷心, 要我流淚!  後來我明白了, 我明白其實天父一早已經為我地每個人都選好左一條路..... 人生每一段路, 天主係有佢特定既用意! 係我地受苦時, 其實天父係鍛鍊緊我地... 其中有d路我地可能會行得比較辛苦, 可能會令人想放棄, 但係呢個只係過程, 雨過後一定會天晴!!! 

向來我都唔係一個好識講野既人... 但我希望大家會明白我以上指出既道理.

啱啱同mpp傾完電話, 希望mpp你亦會明白 "每個人既價值觀都唔一樣, 問題係你點樣去行自己既路, 點樣去過自己既人生.... 記住: 你會係一個非常幸福快樂既人, 因為我係你身邊嘛! (嘻嘻.... 有d唔知醜tim.... >.< )  

 

講開mpp..... 哎呀! 呢個大細路... 我有時都唔知係比佢激死, 等係笑死, 好鬼低能!! 不過, 我鐘意!! (唔通呢d叫物以類聚, 佢越黎越似我喇, 哈哈哈哈..... )

感謝主! 多謝你賜我有份傻傻地既"阿Q精神", 呢份精神陪我行左好多路!! 幫我克服左好多問題, 感恩!! 感恩!!

東洋mpp

擒晚原本同mpp去銅鑼灣食buffet, 誓估唔到Excelsior又爆, 連Cafe One都爆...... 星期四好似係weekday黎之喎.... 真係O哂咀!! 

最後, 我地去左恆隆中心既千両 Sen-ryo度食日本野, 我同mpp都勁崇洋, 不過佢崇東洋, 我崇西洋, 嗯嗯......

呢間d壽司都幾新鮮, 但食品選擇勁小..... 小妹就比較鐘情於熟食, 個魚子炸蝦壽司就very good喇!!

 

好, 東洋mpp係時候要出場喇.... (由於未得當時人同意, 大家唯有睇住佢既背影同手手腳腳先啦, 嘻嘻.....)

  

美麗回憶

係三月份時, 同mpp去過一次台灣旅行, 個次除左係我第一次去台灣之外, 仲係第一次同mpp去旅行tim...

原本我地有兩個選擇, 一係去日本, 一係去台灣... 因為大家都去過日本, 但台灣就未去過, 所以我地決定過去台灣啤一啤.....

點知呢一啤真係好貴呀))))))) 我地四日用左成三萬幾蚊呀......... 不過, 呢個trip真係反得好開心, 好難忘!! 但係有d唔係幾好意思, 因為用左mpp好多錢呀, kekeke....

黎緊既"番卓"旅程即將展開, 我同mpp決定會盡量忍手, 唔買野!! (希望得啦, 哈哈哈哈....).

好! 呢個時侯, 重溫一吓上次我d靚相同美食先....

 

正能量 vs 負能量

近日, 發現大量既正負能量係小妹身邊.....

小妹非常討厭釋放負能量既人, 自己負面就好啦, 點解仲周圍去散播負能量, 令到身邊既人都down上加down....

幸好, 呢個世界係美好既, 我身邊亦有正能量使者, 有嘜苦水同佢講完之後, 真係舒服哂!! 因為呢個朋友會開解你, 讓你可以可以勇敢地去正視問題.

討厭既負能量, 唔該你唔好係人地同你訴苦時, 你仲落井下石, 好似推人去死咁.... sorry! 小妹好似激動左小小, 但係我實在太睇唔過眼喇.... 人家當你係朋友, 先會向你傾訴, 每件事都有解決方法, 係咪應該先去平伏一吓對方既心情, 然後提議吓d有建設性既解決方法呢??

唉.... 呢個世界嘜野人都有!!!

 

正能量 vs 負能量 ~~ 正好配合呢幾星期既天氣, 好極端!!

 

                         好天時                                 雨天時

                  維港既黃昏, 超正!!!                            幣喇!! 九龍好似沉沒左... 好恐怖!

跑呀))))))))))

擒日取消左一堂kick boxing, 因為呀sir唔得閒..... 本來想改跳Jazz, 但又搵唔到教練!! 激死!!

唉!! 帶哂d運動裝束返工, 一心諗住做運動丫嘛..... 點算好呢?  "同事親愛的"即時有個非常有建設性既提議, 就係落維園跑步!  < 嘩)))))) GOOD呀!!! 因為我幸左好耐gar la.... >

係開始跑時, 我都有同"同事親愛的"傾吓計, 惰勁咁!! 但好快...(應該唔使兩三分鐘).....我就feel到我無嘜氣..... 跟住我唯有shut up, 希望可以慳d使嘛, 嘻嘻...

我以緩慢既步速跑左十五分鐘 < 步速快過d伯伯小小, 不過就停過幾次, 點知比其中一個伯伯追番上黎tim, 哼!! > .....  嘩)))))) 原來跑步既感覺真係好爽, 唔使幾分鐘已經可以出一身汗, 雖則好鬼熱, 但感覺唔錯!!

好, 一於再約"同事親愛的", 係好天時就go go go, 去維園同呀伯伯"練"過, 哈哈哈哈.....

查實小妹真係好鬼"shan".... 記得小學開早會時, 我例必暈低!!! 有次重嚴重到要呀sir抱起我入休息室, 瞓緊係張床度個同學都要起身讓比我瞓, 好鬼誇張!

升Form one時, 因為間學校比較遠, 每日搭車比較長途, 就係因為咁..... 我日日返學放學都暈車浪!! 成日嘔....  擦白花油都無用, 真係勁辛苦!!! 後來好似係媽咪買左包話梅比我, 當我feel到唔係咁舒服時, 即刻咬番一粒! 咦...... 真係work喎!!! 之後.... 搭車no problem啦, 嗯嗯......

基本上, 我係一個零運動既正宗香港人! 但由於小妹有條士啤胎 / 豪華臀 / 麒麟臂 / 大象腿 / 同埋周身都有肥膏包圍住..... 所以先有個推動力比小妹 .....   係早兩三年前, 先開始約吓d朋友仔"好間中"咁去游水, 或者打羽毛球........  <因為我實在太懶, 一個月最多最多去一兩次, 有時仲失場tim...  >

不過, 小妹而家肥過隻大肥豬!! 為左唔想比人嫌棄, 我一定要努力做運動!!!  <MPP: 嚴重警告你, 唔好再話我肥D好睇D, 哼!!! >

 

 

 

功夫熊貓 (Kung Fu Panda)

擒晚去左將軍澳睇<功夫熊貓 - 中文版>, 原本我同mpp都無打算睇既電影, 因為我兩個兒甥關係, 所以我地都抱住陪小朋友睇卡通片既心態去觀賞呢套電影....

係套戲開始約兩分鐘既一幕, 由於個部份太太太太富有中國民間非常...非常...傳統既色彩, 我已經心諗: "幣喇! 肯定mpp一陣釣梗魚喇!!".... 但.... 原來呢個只係主角"呀寶"既夢境, 佢一瞓醒覺, 就等同套戲都甦醒埋.......

喜歡陳奕迅生鬼既配音 !!

喜歡動作超真實, 無嘜勁卡通片feel !!

喜歡"呀寶"超多豬腩肉, 好可愛 !!

喜歡套戲主題係中國, 但無"好娘"既感覺 !!

喜歡套戲超爆笑, 雖則有d低B, 但有內涵 !!

喜歡有教育意義, 但唔老套 !!

喜歡"呀寶"極似我大姐夫, 令我不斷因為咁而勁爆笑 !!

 

講到底, 呢套戲始終係一套動畫片... 不過, 以動畫片黎講, 呢套戲真係非常成功!!!

首先, 從戲院內既小朋友笑聲 (特別我兩個兒甥, 坐係遠處我都聽到佢地d笑聲.....), 已經肯定小朋友十分喜愛!  另外, 套戲唔單止小朋友, 連我地d大人都係笑爆咀咁離埸, good!! 

咁當然.... 有d位我地大人唔會好似小朋友咁狂笑啦!! 有時睇吓呢d笑片都幾爽gar, 唔錯!!! 唔錯!!!!

 

哈哈, 今晚我都要去打功夫wor.... 不過唔係"呀寶"既Chinese Kung Fu, 而係我打kick boxing呀, 哈哈哈哈.......

 

突然, 諗起呢首歌 ~~ Kung fu flighting ---> (無啦啦搵到呀RAIN主唱, hehe....)

 

 

 

世事無常

數數手指, 仲有一星期就出發去旅行.... 由於爸爸媽媽年紀開始大喇, 所以小妹早係年頭時, 已經同家姐相量, 希望可以搞一次全家人去旅行.

 

由於兄弟姊妹眾多, 以及我家兒孫滿堂, 加上父母亦開始年老關係, 我實在...實在....太希望可以趁父母而家健健康康, 有足夠力氣出外既時候, 一家人可以旅行, 一起去享受全家人一起既愉快時光.

 

不過, 期待已久既旅行, 係幾星期前有d沖擊........ 爸爸係幾星期前, 左腳突然感到無故痛楚......

 

家姐即時已經帶過爸爸去過醫院作詳細檢查, 而一向驚青既爸爸, 亦前後睇過7個唔同醫生作檢查, 希望搵出真正既病因, 對症下藥!  而初步爸爸都已經知道是咩野既一回事, 而家係治療當中, 可惜病情無嘜太大進展.....

 

前兩日, 同兩個家姐一齊返屋企探望爸爸, 逗留期間, 大家姐發現爸爸入左房偷偷流淚, 因為佢好擔心自己隻腳..... 我同二家姐知道後, 便隨即入爸爸房度安慰佢, 眼淺既我當然無用地即時流淚, 而一向堅強既二家姐, 仍不禁雙眼通紅.....

 

而家, 爸爸好乖乖咁按時覆診.... 而作為子女既我, 除左安慰爸爸: "無論你今次可唔可以join我地去旅行都好, 我地一定會等你隻腳好番後, 再陪你去 "反" gar!!!"....... 而係呢幾晚, 我不斷地祈禱, 希望慈愛既天父可以治癒我爸爸, 讓我爸爸可以馬上痊癒, 同我地一齊去旅行!!

 

早前, 收過一封好有意思既e-mail, 希望下面既文章可以感動你! 令大家都會懂得珍惜!!!

 

 

[心情文章] 倒數 (一個很有意思的故事)
 
從事投資顧問的我，從來都很愛自己的家人，愛自己的伴侶。至少 ，我以為是這樣。
 
我每天的主要工作是緊貼著香港及美國股市，就是這樣 ，已經花掉大半生時間。餘下的時間就安置在情人、朋友、及家人身上。為了《愛得太遲》的內容，為了對家人、情人的內疚感而流過眼淚，但淚痕風化後，仍需繼續為「將來 」而賣命。為了《無事常相見》的歌詞，為了曾被冷落的好友而眼淺過，但深呼吸一口氣，還是要營役餘生。
 
為了未能抽空回家團年，為了未能抽空陪女朋友驗身 ，我們竟花得起寶貴的時間來冷戰。但我想，父母、伴侶，都是最親的人，應該會明白的。

我的生日快要來臨，但沒有期待過，因為，根本沒甚麼值得慶祝 。反而，想一個人靜下來，享受一刻的寧靜。在南丫島的度假屋內，我準備感受一個較孤單的生日。
 
在晚上，靜坐在度假屋的露台，沐浴在帶有點點鹽份的微風中 ，整個世界都變得很寧靜。突然，我迷迷糊糊的聽見頗陌生的聲音，我再細心一點聽 ……原來，他在跟我說話：「 ……年青人，我希望今年送您一份很特別的生日禮物，甚麼也可以。」

 

我想，我大概已經進入了夢境，跟神仙對話。我微笑回應道：「是神仙嗎？那……我真的甚麼願望也可以提出？」

「對。」

「那，我就希望有一雙眼，能夠看透每一隻股票升跌時間。」

「沒有問題，那對眼睛已經給您了。」

夢醒了，一笑置之。
 
第二天，回到戰場上，我看著升得頗急的「森力鋼鐵」，心想 ：「它還可以升多少天呢」？突然間，有個發光的「 3」字浮在「森力鋼鐵」之上。三天後，它真的插水式回落了。原來，這份生日禮物是 ……真的。

我善用這雙上天賜給我的「眼睛」，在股票市場嬴了很多場勝仗 。

不過，我已經有很多天沒有見過家人和女朋友了。
 
今天回家，一推開門，就向著自己的房間走去，隱約的聽見媽媽說： 「明天是爸爸生日，你可以回來吃飯嗎？」

 

不過，爸爸立即搶著說：「不用回來，你忙你的工作吧！」
 
我放下了工作包，就走到客廳跟爸爸說：「如果可以的話我會………」

 

突然，我看見爸爸的頭頂出現了一個發光的數字……「35 」。

我立即給嚇呆了。

之後，我慢慢回到房間，35天後，爸爸會……

爸爸生日那天，我盡能力完成手頭上的工作，回到家，爸爸已經睡了 。

我在房間像小朋友的哭起來。

三天後，我請了假期跟父母飲早茶，看見爸爸的發光的數字是「34 」……原來，這是我還可以見他的次數。

 

慢慢地，我也看見媽媽的頭上浮現了「45」這個數字。
原來，看著自己跟家人的相處日子在無情的倒數，心，是很痛 ，很痛的。

星期天，被我冷落了的女朋友終於來電，想見一見我 。我們就相約在又一城的COVA見面，因為我記得，她很想到 COVA 吃甜品，但我一直未有時間陪她。我到了好一陣子，她還沒有出現……半小時後，我看見站在大門口的她 ……頭上面出現了「1」字，我……還看見她身邊多了一個「他」。這次之後，我們真的再也沒有見面。
 
一個星期後，我辭掉了工作，盡量陪伴在家人的左右 ，用儲下來的積蓄跟他們去旅行，直至爸爸患了重病 ……直至爸爸頭上終於出現「單位」數字。最後陪伴爸爸的幾天，我盡量逃避正面面對他，最多也只是低下頭跟爸爸說話，因為我不希望看見「3」、「2」、「1」。
 
在隱約看見爸爸的「1」字那刻，我離開了病房，走到街上。

在途中我一直淚流滿面，眼前的東西都已經看得不清不楚。

 

在醫院大門外，我看見媽媽，抹乾眼淚後，她的頭上竟然出現「 1 」字……媽媽…… 我轉身看著身邊的途人，全部都在頭頂掛著發光的「1」……我呆呆的退後一步，就看著馬路上的巴士撞向自己，來不及反應，我已經眼前一黑。
 
很光……很光……原來，已經天亮了……原來我還在度假屋的露台上。
多謝他的「生日禮物」，我想，我大概知道餘下的路應該怎樣行。
我們……是不是要看見「倒數」，才會懂得珍惜可以親眼看見他 / 她的「這一次」。
 
朋友：
就由今天起，每次與父母、親人、伴侶、朋友見面，就請珍重珍惜。
要學懂世事無常。

Hancock - 街頭超人

擒晚同mpp去左UA Times Square睇 , Will Smith又一套輕鬆英雄戲....  小妹好小鐘意黑人, 但Will Smith就例外!

Will Smith飾演既"享哥"擁有超能力, 但佢成日用錯方法去拯救人類, 所以雖則佢不斷救人, 但就不受人歡迎, 甚至討厭佢.....

好深刻印象既一幕係"享哥"開始時非常cool..... 直致一幕佢要開日同班警察講"GOOD JOB!"..... 嘩)))))))) 超爆笑呀!!!

呢套戲既情節鋪排得非常好, 無悶場! 中間又帶有一段幾千年既感人愛情情節.... 整體黎講, 呢套戲有笑位, 有感動位, 中段又有緊張刺激位, 劇情仲有d意想不到, very吉!! 值得一看!! 

好! 先黎一d精彩劇照

開場時, 享哥不羈地瞓係張長凳度, 型!!

擁有超能力既享哥, 一手託起架車, 型!!

臨坐監前, 享哥好型仔咁比班傳媒訪問, 型!!

享哥著老西, 型!!

 

好! 而家去片!!!

 

Seven Eleven

登登登登.... 小妹係呢間公司不經不覺做左三年喇!!

 

查實小妹係舊公司都做左成十年, 幸運地舊老闆同上司都勁錫我, 核突d講句, 我稱得上"老屎忽", 無人會蝦我, 個個同事都好錫我!  但做得太耐喇, 始終希望可以出去睇睇外面既世界, 而且知道自己多多少少將會有d改變, 唔係好想同人去交代..... 所以決定離開.

 

由於舊公司比較傳統, 新公司+鬼佬老闆相比下比較modern, 初初入黎呢間公司, 真係好唔習慣....  坦白講, 新公司比較辛苦, 出差機會比較多, 但勝在自己既見識可以相對多左好多, 最重要係可以迫我自己去獨立處理事情, 唔使咁依賴人! 而且人工仲...... 哈哈哈.... 滿意啦!

 

係我個team入面, 小妹年紀較大, 突然比同事們起左個朵, 叫"Aunite Zoe"...... OH NO!!!!!  

  不過咁, 由於我班同事同我一樣, 都係"超低能勁攪笑", 雖然有時工作或出差比較辛苦, 但係公司度, 好多時我地都嘻嘻哈哈又一日!

 

特別一提係我係呢間公司認識到"同事大舊", 佢雖然年紀比我小, 但思想卻比我成熟.... 好多我處理唔到既私人事, 佢都一一比左好多有建設性既建議比我! 而且佢既記性極之強!! 佢可以厲害到記埋我d私人事, 真係very吉, 因為小妹既記憶真係得128MB, 哈哈哈哈......

"大舊"非常清楚小妹既性格, 好多時佢都不斷push我去做一d我逃避緊既事, 令我勇往直前!! 而且, 近呢兩年, 相信佢係見得我最多"喊包樣"個位....... 可以講, 如果唔係識到"大舊", 或者我而家仍然活係"我既黑暗年代"!

大舊, 多謝你既支持!!  "些些"!!!!

 

 

話個秘密比大家知, 其實大舊有個"私生子", 佢有一個六歲大既仔, 但到而家佢都未結婚.......

 

佢個仔叫"細舊", 佢個樣同大舊好鬼似!! "細舊"成日流口水, 又為食, 六歲仔仲要"痴"實媽咪瞓...  媽咪楂車時, 佢又坐唔定, 正一百厭仔! 

 

"大舊"做住何野都係為左個仔, 包括買車買樓, 因為佢想個仔有一個舒適既環境生活, 部車係因為佢想每逢假期, 都可以帶個仔去郊外或沙灘玩.... 坦白講, "細舊"真係好幸運! 呢個大舊媽咪好難搵, 佢對自己無嘜要求, 但不論"細舊"用既/食既, 全部都係好野黎gar! 大舊, 你實在太偉大喇!!!!!!

 

好!! 呢個時候, 比你地見吓呢個Lucky仔先!! (sorry呀, 大舊, 我未得你同意底下, post左你個仔張相出黎, 希望你唔會介意).

細舊, 你要乖乖孝順媽咪呀!!! 哈哈哈哈...