愛心湯 @ 川芎白芷天麻魚頭湯

每個人對愛情既睇法都唔一樣, 同情人相處, 以及溝通, 各方面都唔會一樣.... 有d好似電影一樣...... "愛你愛到剎死你".... 小妹雖然無咁激... 但..... 小妹唔排除會愛你愛到咬死你, 又或者愛你愛到食死你, 哈哈哈哈......

我愛我既mpp, 所以我絕對希望佢身體健康!! 小妹唔介意入廚房, 成日都好想煮多d野比佢食.... 特別係而家多左個焗爐係屋企... (辛苦你喇mpp, 成日做我隻白老鼠... 嗯嗯... )

呢排mpp耐唔耐都會頭痛, 小妹心痛死了.... 小妹決定煲個靚湯比我既mpp哥哥飲, 希望佢可以少d頭痛..... 呢款湯就係<<川芎白芷天麻魚頭湯>>喇!!

材料:

大魚頭一個 (開四邊): $27

西施骨: $15 (我諗唔使太多, 因豬肉作吊味之用)

天麻一兩: $28

川芎白芷: $6

杞子/紅棗(去核)/圓肉/蜜棗/薑:  各少許

做法:

1. 西施骨先飛水

2. 魚頭先用粗鹽淹洗, 落薑煎香魚頭

3. 其他藥材洗淨待用

4. 除魚頭及西施骨外, 所有材料隨水先煲滾

5. 水滾後放入魚頭及西施骨

6. 煲三個鐘

7. 熄火落鹽調味即可

TIPS:

小妹煲湯心得, 就係煲湯時, 先用大火滾15分鐘, 後用細火煲2-1/2小時, 最後再開大火再煲15分鐘..... 老火湯即成!!! YEAH!!!!!!

 

功效: (參考:http://hk.myblog.yahoo.com/jw!MUwxVRGRAgLrXl2KmS0hrM1HAw--/article?mid=102)

功效：驅風活血，健脾醒腦
天麻，是廣府人熟識而且常用驅頭風，止頭暈眩痛的要葯。其味甘，藥性平和。有平肝息風，定惊功效。常用於治療肝陽上亢之眩暈頭痛，惊厥癲癇，抽筋，中風癱瘓，高血壓，偏頭痛，肝腎不足之四肢麻木等症。

近代研究，天麻含天麻素等物質不但能安定鎮痛，還有抗炎，增強記憶，擴張外周血管，增強心腦血流，增強心腦對缺血缺氧的耐受力，因此而用於治療神經衰弱，神經性頭痛，三叉神經痛，血管神經神頭痛，長期伏之頸項刺痛，腦血管病之後遺症等。

而川芎藭，即川芎，川白芷，即白芷是活血驅風，行氣止痛要葯。能擴張周圍血管，增強冠狀動脈血流，有較強的止痛鎮靜作用。與天麻為伍，煲魚頭湯，不但有癖穢除血腥，增強本湯香甘鮮味，而且使湯水之葯力倍增。

大頭魚，因魚頭特大而得名。此魚，味而葯性溫。魚蛋白豐富而質優，有暖胃益人功效，是最正氣之淡水之魚類。大魚頭，有極為豐富之膠質，更有以形（魚頭）補形之妙。天麻川芎南棗魚頭湯味香腴而鮮味，葯味俱全。

後記:

- 呢款湯味道勁甘, 有d似當歸味, 煲完湯兩日, 成屋都仲有陣味, 都幾臭 !! 為左mpp... 無所謂啦, 我仲打算每隔一兩個月就煲一次比佢飲.........

- 買魚頭時, 啱啱見到魚擋係度擋緊條大魚, 小妹即刻買左呢個勁新鮮既魚頭.... 條魚有幾新鮮?? 生猛情度簡直嚇死人... 小妹係屋企洗乾淨哂個魚頭, 佢d肌肉仲係度郁郁吓...... 咦~~~~~ 真係幾恐怖呀!!