Fruit Tart

星期日, mpp帶左佢媽媽&妹妹黎我屋企, auntie第一次上黎, 小妹極之緊張, 早幾日已經開始執屋攪衛生, 希望比auntie一個好印象.....(擦定鞋嘛..... 哈哈~~)

小妹希望可以大體小小, 決定整d小食黎招呼auntie...  結果, 未學行先學走既我, 膽粗粗咁去整我未整過既 -- 雜果撻!!

(嗚謝blog友小雪既食譜: http://hk.myblog.yahoo.com/jw!min1yWueGQ23Hc681rHRURBri9k-/article?mid=2) --> 小雪, 你個食譜好掂!!　thanks!!!

 

星期六放工後, 小妹極速去買材料, 然後九秒九返屋企開工!!! 企係廚房足足玩左4個鐘至完成..... (因為小妹怕個fruit tart失敗, 所以係雪個粉團個半鐘入面, 小妹多做一個木糠布甸, 以防萬一!!!!! )

雖然花既時間比較長, 但當小妹完成呢個fruit tart時, 我真係開心到想喊.... 當時只有自己一個人係屋企, 但興奮既我望住個fruit tart不斷傻笑...... 心入面仲不斷讚自己係天才!!! 實在好低b......              

好! 低b還低b, 先同大家分享吓個食譜:

材料 (撻底)

麵粉           150克                            雞蛋                  半隻

糖孀            40克                             牛油                  100克(可選無鹽牛油味道較佳)

雲呢拿油    4滴                                黑朱古力(溶液) 適量  (可用熱水坐熱)

** 我屋企無古古力, 所以我skip左呢一部份, 但個tart依然好好食!!

** 另外, 一向大意既我, 又漏放雲呢拿油... 唉!! 不過, 不過無損個tart既味道!

 

做法:

1) 將牛油放至室溫,可先把牛油切成小塊

2)把糖孀分數次攪入牛油拌勻,攪至奶黃色及滑身

3)將雞蛋發勻再續小加入牛油中(要令雞蛋完全混入牛油)

4)再加入麵粉混入成粉團,放入冷藏1.5小時(雪硬便可)

5)用木棍搓成薄粉團,再用撻模印成小塊

6)再用手指輕壓粉團於撻模中(請用手指向撻邊輕壓)

7)修去多出來的撻邊,用牙籤在撻內刺小孔,放入200度焗爐,約15-20分鐘

8)至金黃色為止,涼透後張餅底底層掃上朱古力溶液. ** 我無做呢一part

 

                        入爐前                                                     入爐後

 

 

材料 (吉士cream)

免煮吉士粉  100克                             牛奶或水250克(我個人認為加入牛奶較香滑)

士多啤梨及奇異果及桃 - 適量             糖  1茶匙

魚膠粉    1/2湯匙                                 熱開水  5湯匙

橙酒       1茶匙  **若冇橙酒,可以用果醋代替但要加多1/2茶匙**

** 屋企無橙酒, 小妹直接只用魚膠粉+糖開水,ok, 味道無問題!!

 

做法:

1. 將吉士粉及牛奶用打蛋器打勻,打至傑身,分小份放在撻內

2. 再放上水果裝飾

3. 將魚膠粉加熱水加糖及橙酒混和,成魚膠水

4. 將魚膠用掃掃上果撻上.冷藏半小時

5. 大公告成.  

一分錢一分貨, d生果真係好新鮮, 好鮮甜!!

 

做左總共16個fruit tart, 由於小妹屋企人咁啱係星期六晚過黎食飯, 小妹當然唔會大細超, 請左幾個比媽咪,爸爸同好鐘意食fruit tart既姐夫食! 姐夫一句好味, 仲連食兩個fruit tart... 而且媽咪,爸爸,姐姐同mpp食完都話好味, 小妹真係打左一支大大既強心劑!!!

擒日auntie同mpp妹妹見到個fruit tart時已對小妹讚不絕口, 食完都話好味, 又話我好心機, 個tart好靚又好味! 而且佢妹妹又係連食兩個.... 嘻嘻~~~ 我真係勁勁勁滿足&開心!

作為一個女友, 我諗我應該算係入得廚房, 出得廳堂! mpp, 你認同嗎? 哈哈~~ (自滿中......)