大蝦白汁意粉

屋企包淡忌廉就快到期, 擒晚小妹又整"大蝦白汁意粉", 雖然白汁好肥, 但真係好好食呀!!!

 

材料勁簡單:

洋蔥 (少許, 切細粒)

火腿 (切絲)

蝦 (我買雪藏蝦, 所以要先溶雪, 然後加少少鹽同胡椒粉略醃)

淡忌廉

碎芝士

意粉

蛋1隻

 

做法:

意粉先按包裝袋上時間煮軟, 備用

落橄欖油 (唔怕肥既話可用牛油, 會更香口), 先炒熟洋蔥粒

之後放火腿絲&蝦同炒

炒熟蝦之後, 加入淡忌廉, 落鹽同少少糖調味

加入意粉, 大火快炒

然後離火加入碎芝士即成!!

** 註: 最後可加入蛋黃(記得要離火呀), 令成個意粉更creamy更好味... 不過, 小妹最後放棄左.... 因為我怕膽固醇高呀, 哈哈哈哈~~

 

食之前加少少香草或黑椒碎, 真係好味!! 個樣係咪幾OK呢..... 哈哈~~~

鐘意食白汁意粉既朋友, 不妨試試! 超簡單又易煮, 半個鐘頭包有得食, 快!!! 靚!!!! 正!!!!

好鬼為食既同事"崖上的波記", 成日都想我整呢個意粉比佢食...... 當佢知我擒晚會煮呢個意粉時, 佢千叮萬囑我今日一定要帶d比佢試.....

啱啱比左"崖上的波記"同"可愛bowling"試完之後..... 佢地大讚好味!!! 小妹呢一刻真係感動極了..........!!! 呀媽, 我得左喇!!!