Mzz咖喱面世篇

自己期待已久既 "Mzz咖喱" 終於面世喇~~~

 

呢個咖喱真係超好味, 擒日試菜後, 已經旋即成為我既第一位招牌菜....... 呢個咖喱有個種麻麻地辣既feel, 即係要一路食, 一路要攞住紙巾抺鼻水個隻, 好正!!!

 

而且, 呢個咖喱汁完全唔需要用生粉水埋獻, 可以將薯仔片完全溶化左係個咖喱汁入面.... 呀蘇教呢個快咖喱果然無介紹錯, 極力推介!!!!!

 

除左咖喱雞翼外, 仲有蠔油生菜

 

坊間話咖喱熱氣, 小妹仲特別係星期六煲定雞骨草作打底, 而且, 晚餐前後又勁食車厘子同橙, mpp.... 我對你係咪好細心呢.... 哈哈~~

 

 

小妹將材料略為修改, 成個煮咖喱過程唔使40分鐘, 鐘意食咖喱既朋友, 真係不妨試試!

材料：

-          雞翼十五隻

-          薯仔一個切片 (= 薯仔片)

-          薯仔兩個滾刀切大件 (= 薯角)

-          利川椰汁咖喱醬（玻璃裝） - 三大茶匙

-          洋蔥半個

-          指天椒三條

-          蒜頭三粒

製作：

1. 雞翼用豉油, 老抽, 生粉, 糖先醃好


2. 爆香洋蔥備用


3. 炒香蒜粒及指天椒


4. 加入雞翼, 再放入薯仔片 + 洋蔥略炒


5. 加咖喱醬 + 水  (大火炆半小時, 水必須要藎過雞翼)


6. 另將薯角炸好


7. 半小時後, 加入已炸薯角略炒, 加兩小匙糖調味即成!!

 

TIPS：

- 炒指天椒時, 全屋會有勁"攻"鼻既感覺,輕則會咳, 嚴重既會打噴嚏!! 係廚房既我打左兩個噴嚏, 而係廳既mpp就係咁咳, 好攪笑!

- 注意大火炆雞翼時, 要耐唔耐炒吓佢, 因為個汁入面有大量薯仔片, 好易會收乾汁, 有需要時要加入熱水.

- 如果唔想太辣, 指天椒可以改為一隻(去籽)做吊味!