家常便飯

前晚, 原本mpp打算同我出街食飯, 無嘜idea下, 我建議返屋企又玩煮飯仔, 並且係數十秒內決定煮嘜野餸菜 (又要認叻, 嘻嘻~~)

 

呢餐飯好有住家feel, 無嘜花巧..... 為左mpp, 以後所有餸菜都希望可以做到健康為上!!!

 

不過, 可能自己要求比較高, 煮完餸後覺得唔慌好食, 原本連相都唔想影, 不過, mpp話影左先啦.... 咁.... 我就只有影左一張相咁大把!!  哈哈.... 點知出黎既味道絕對唔差, mpp收貨話好味之餘, 仲讚我原來都識煮幾多野添, 好開心呢~~~

 

 

蝦米粉絲炒節瓜

呢個餸好簡單, 最花時間就係要將所有材料切絲, 就係咁, 成晚不斷切切切切切!

材料:

蝦米約十粒 (我d蝦米比較大粒, 先用熱水浸洗後, 略切小粒)

節瓜兩條 (洗淨切條備用)

粉絲兩包 (用水浸軟, 在粉絲中間剪成一半, 方便炒時, 亦方便夾起 -- 個人意見!!)

肉絲少許 (用豉油, 老抽, 糖, 鹽, 豆粉略醃)

蒜茸 + 指天椒  (我手多多落左隻指天椒, 辣到mpp飛起, 下次會唔落 ^0^)

煮法:

炒香蒜茸 + 指天椒,

落蝦米爆香後, 加入肉絲

之後落節瓜及粉絲同炒

加水, 以雞粉+鹽+糖調味,

煮至粉絲及節瓜軟身即成!

註:

- 聽靚女媽咪講, 節瓜好正氣, 而且呢個餸少肉多菜, 真係多食無妨!

- 呢個餸煮出黎時勁大碟, 足夠四個人食, 下次再煮時會減份量!!

 

 

麻婆豆腐

材料:

蒸煮滑豆腐一磚, 切粒 

肉碎  (用豉油, 老抽, 糖, 鹽, 豆粉略醃)

煮法:

先炒香肉碎, 再落豆腐

加水及蒜茸豆瓣醬

肉碎煮熟後, 加糖調味

及用生粉水埋獻即成!!

註:

- "蒸煮滑豆腐"我都係第一次煮, 煮個時d豆腐好易碎開, 好鬼擔心!!! 不過, mpp激讚d豆腐好滑好味... 下次再煮時, 我會將佢切大粒d, 免得煮完出黎d豆腐碎哂!!

- 豆腐好有益, mpp身體好需要大量豆類類品, 小妹現正努力找尋豆腐食譜, 希望可以煮多d比佢食!