大食會 @ 焗豬扒飯

老闆呢幾日放假, 同事們都爭取係呢幾日放鬆心情工作!

擒日有同事建議不如開大食會, 貪玩既小妹當然大力支持! 大家都好醒目地爭住做"菠蘿腸仔" / 買生果 / 買雪榚... 等等既easy job!

小妹原意想做"白汁海鮮意粉", 因其中一個同事唔鐘意食白汁, 所以小妹最後整左"焗豬扒飯"!

擒晚OT左一陣, 買完材料返屋企已經成7點半! 前後攪左成兩個鐘.... 登! 登!! 登!!! 登!!!!!! "焗豬扒飯"終於出爐喇!!!!!!!! 香噴噴!!!!! 睇得又食得!!! 勁靠得住呀!!! YEAH~~

 

好... 講番d食材先...

- 豬扒四大塊

- 蕃茄四個

- 洋蔥一個

- 蝦六隻

- 西蘭花一棵

 

做法:

1) 九秒九先去煲飯 (好趕呀~~)

2) 西蘭花切細件, 用鹽浸洗

3) 洗淨四件豬扒, 用搥打鬆豬扒, 將豬扒一開二, 變成八件

4) 豬扒用豉油, 糖, 鹽, 豆粉, 薑, 蒜頭, 少少老抽同麻油醃好!

5) 將蝦切粒, 用少少鹽同胡椒略醃

6) 蕃茄及洋蔥洗淨切細小件

 

開鑊喇~~~

A) 西蘭花放入熱水(已加鹽), 煮好備用!

B) 先煎三隻雞蛋, 炒成細小件備用!

C) 煎熟豬扒備用!

D) 洗乾淨個鑊再落油炒飯, 加入蛋件及少少鹽兜混上碟

E) 將豬扒放在飯面上

F) 落油炒香蒜蓉, 加入蝦粒及洋蔥件炒香, 放入蕃茄件同炒, 加水煮滾, 落糖 / 鹽 / 豉油/茄汁調味, 最後埋生粉水做成獻汁

G) 將獻汁淋在(E)上

H) 灑上芝士碎, 放入焗爐240度, 焗十分鐘

I) 加入已煮好既西蘭花攪掂.... 個LOOK真係好得!!

 

開完大食會後, 同事們都好比面話好食... 仲話好食過一哥添..... 噢! 小妹真係感動極了!!!!  不枉我企係廚房足足個幾兩個鐘! 好開心呢~~