星期一又去九展,
數數埋埋...
今日係第5次去法國婚紗九展間舖....
因為上次d相,
約有十幾張相面色有問題 (全部都係mpp d 相有問題),
小妹接受唔到mpp既問題相片,
所以我地退左相...
sales Clara表現都算係咁...
雖然起初佢話原本d相無嘜問題,
但佢知道我地堅持要重新執相後,
佢都算幾落力幫我地跟進,
新既相片膚色好得多,
mpp靚仔哂 :)
10月中會整好哂d相薄同相架.....
今次無送相服務,
到時又要再去多轉九展!
影一緝婚紗相...
去左3次九龍塘間舖
(試衫 / 改girdle / 影相)
加上total 6次九展..
(2次揀相 + 睇1st相辦 + 睇排辦 + 睇改好既相 + 取相)
好在我地預鬆左時間,
否則結婚時都唔知有無相攞到手呀!!
小妹呀哥家姐眾多, 計計埋埋... 結婚當日會有7對龍鳳鈪, 婚後小妹即刻會成為富婆!!
金價高企, 未來奶奶早係約15000+時買定龍鳳鈪比小妹!
兩個家姐仲好, 一早已經係佢地以前既嫁妝入面, 預留左龍鳳鈪比我, 果然係我既好家姐, 知我一定嫁得出, 哈哈~~
早前金價最高去過$19000+, 上個月見金價回落到$18000, 小妹約埋媽咪, 爸爸同三哥出動買龍鳳鈪!
原本媽咪想買對粗d既龍鳳鈪比我... 不過, 金價實在太嚇人... 小妹最後揀左對唔係好粗既鈪, 係咪好乖女呢~~ 
媽咪仲買埋一隻好重手既介指比未來女婿, mpp你睇吓我媽咪幾錫你吖!!
更感動係.... 爸爸有一條廿幾年前買落既頸鍊送左比我... 佢地都唔多記得廿幾年前條鍊值幾錢... 但今時今日, 條鍊已經升價N咁多倍, 差唔多成$30000, 真係要多謝爸爸!! 結婚當日戴上爸爸戴過既頸鍊, 個種感覺肯定好warm呢~~
呢對係三哥買比我既, 多謝三哥!!
呢排金市股市大動盪, 今日金價回落到16000+.... 哎呀.... 激死人喇!!
揀左日子係11月過大禮, 結婚有好多事真係要加快進行!!
雖然我同mpp係行西式婚禮, 不過, 媽咪好傳統, 中式結婚禮儀樣樣都要跟到足.... 所以擒日約埋大家姐一齊去買結婚用品, 多個人多個意見! 加上大家姐有經驗, 而且佢嘜都識, 媽咪又好buy佢講既野, 所以佢一定走唔"luck", 要同我同mpp一齊去辦貨!!
行左成日, 對腳已經攰到唔屬於自己咁....
我地三人係中午出發, 第一站先去訂過大禮用品! 呢間舖開左十幾年, 家姐N年前嫁個時都係幫襯佢地, 不過而家呢間舖改左名做"為記", 老闆講主理"輝記"個位女士係佢家姐 (or 呀嫂... 唔係記得好清楚... 
輝記過大禮專門店
地址 : 觀塘瑞和街街市市政大廈地下24-25號鋪 Tel : 2345 0653
何謂過大禮
結婚乃人生大事。古時婚嫁更需按照習俗、擇吉迎娶，先過文定，再過大禮......種種繁文縟節，不勝枚舉。時 至今日，雖然多數新人主張一切從簡，但仍少不免依循部份舊禮儀，但求事事順利，鸞鳳和鳴。其中以「過大禮」最為人重視。
「過大禮」演變至今，已成為過文定的了。即男家攜備禮金和多種禮物送到女家，作為訂親儀式。禮餅是過大禮時不可缺的，結婚派餅的傳統，更是一直沿用。
之後, 我地就去左訂帖同買結婚用品 !! 小妹幫襯既佢一間樓上舖My gift shop, 上次買既結婚公仔都係幫襯佢地, 三位年青人攪既樓上舖, 比我既感覺好有heart!
- 由於我同mpp既婚禮係西式, 所以我地選用西式帖! 好喜歡韓國style既喜帖, 雖然要成十幾蚊一張帖, 不過, 實在太喜歡韓國帖既款式, 唯有係第二方面慳錢啦, 哈哈~~
- My gift shop仲有其他結婚用品賣, 價錢同出面會貴d... 不過, 買滿$500有85折, 由於價錢唔係差好遠, 唔想煩底下一次係佢地舖頭攪掂!
之後轉戰去買龍鳳被同luggage, 媽咪千叮萬囑龍鳳被一定要有龍有鳳... 睇過好幾間舖後就買左呢套喇~~
luggage方面, 原先以為媽咪一定要買紅色... 好彩家姐楂fit話媽咪桃紅色ok, 呢個款好girly, 好鐘意呢~~
上星期日, 同mpp去左葵芳睇話劇 -- 《在那遙遠的星球．一粒沙》.
故事內容:
http://paper.wenweipo.com/2011/09/09/OT1109090001.htm
小妹感想:
呢套劇由梁祖堯主演, 可惜成套劇梁祖堯既演出並唔多.... 另一主角邵美君既戲份就好重!
第一次睇邵美君既劇, 一睇就知邵美君係好戲之人..... 但可惜成套劇佢太多對白... 不斷講好多....好多....好多... 對白!! 實在令人有點兒悶既感覺!
好在尾段有d攪笑位, 令成套劇有番d色彩!!
一眨眼, 只剩低97日... 好期待呢~~
結婚仲有好多大大小小既野未攪 (包括印餅咭, 印帖, 買嫁妝, 揀相做成長片等等...) .... mpp係淡定派, 而我就係急進派.... 三摧四請下, 上星期mpp終於肯出動同我去買結婚介指~~
行左幾間舖, 幸運地, 係PN度揀中我地兩個都鐘意既介指! PN係我心水舖頭, 價錢雖然貴少少, 不過款式就好fashion, 好靚, 可惜我影呢張相片影得好差... 
訂對介指要1個月, 如果size唔啱. 又要等多一個月改, 亦即係話, 快則要一個月, 慢則要兩個月先至可以攞到對介指!! 而家計落時間真係差唔多, 如果再遲D買, 分分鐘買唔切, 到時mpp你用嘜黎娶我呢??!!? 
PN而家10週年, 做緊9折, 好開心可以慳左錢, 仲有好靚既介指枕送添~~~
小妹以前成日都有小病, 一年總有幾次發燒肚痾... 今年touch wood講句, 除左入院做小手術外, 身體好ok呀~~
上星期一係唔病, 一黎就病得杰撻撻.... 幾日內痾左廿幾次!! unbelievable!!!
- 星期三晚開始微燒....
- 星期四晚肚痾左4次....
- 星期五無返工, 一早去睇醫生, 7粒藥丸, 可惜食左藥都無嘜效, 成日痾左成10次.... 夜晚個胃開始痛.... 痛到瞓唔到.....
- 星期六一早打電話比姑娘, 姑娘叫我落去攞d新既肚痛藥同止痾藥... 痾既次數係少左d, 成日痾左6次, 不過胃痛仍然持續....
- 晚上沖完涼後, 胃痛加劇... 頂唔順下再打電話比姑娘, 今次姑娘話要見醫生!! 當晚mpp有事, 小妹一個人落樓, 個胃每隔10分鐘就"拿"一"拿"咁痛, 痛到我真係差d就暈係街上面.... 見到醫生後, 醫生幫我打左支止痛針, 同埋比左多兩種胃藥比我.... 醫生話如果星期日都仍然係咁痛, 就叫我入醫院.... >.<
- 星期日朝早, 身體已經好番好多.. 不過依然有少少肚痾, 總共痾左5次!
- 擒日返工, 去公司附近既醫生, 呢個醫生唔錯, 講左好多有關腸胃炎既野比我知, 不過醫生話我d菌好容易傳比人, 所以建議我返屋企休息下... 就係咁, 下畫就請左半日假!! 食左藥後, 今日已經無痾喇 !!
- 可惜既係..... 我將我d菌傳左比我個mpp.... mpp個肚唔舒服, 今日到佢請左病假, 希望mpp快d好番啦~~
** 聽醫生講, 呢排d菌都好勁, 大家都要小心注意食物同個人衛生, 免得好似我同mpp咁不幸中招 !!
上次整既"特濃朱古力慕斯凍餅"餅底唔係好得 (太梗唔好食), 不過個mousse就勁勁勁勁好味!
見屋企有大部份材料剩底..... 又見9月我地個team有4個壽星仔女(包括我).... 又好想改良吓個餅底..... 種種原因底下, 小妹上星期又整左個chocolate mousse cake, 帶番公司同班同事分享下!
今次用正方型模, 個mousse cake好平實, 唔花巧, 因為著重內涵, 哈哈哈哈~~
特濃朱古力慕斯凍餅 6”
餅底: -
消化餅碎 70g ---> 改60g
無鹽牛油 35g ---> 改25g
慕斯: -
蛋黃 2隻
朱古力奶 50毫升
可可粉 5g (約一茶匙)
糖 10g
淡忌廉 200g
魚膠粉 6g
凍開水 50g (約3湯匙)
55%濃度朱古力 100g
裝飾: -
可可粉 適量
做法: -
1. 將牛油用熱水坐溶, 倒入消化餅碎攪拌, 平均放入餅模內, 用匙羹將餅碎壓實放入雪櫃備用.
2. 淡忌廉打至6成後放入雪櫃備用.
3. 55%濃度朱古力用熱水坐溶; 魚膠粉與水開勻後用熱水坐溶.
4. 朱古力奶加糖和可可粉慢火煮至溶解, 撞入已拂勻蛋黃中. (分2-3次加入, 拌勻).
5. 加入魚膠水 (分2-3次加入, 拌勻), 用篩將混合物過濾, 再加入朱古力漿拌勻.
6. 然後與淡忌廉拌勻.
7. 將慕斯漿倒入餅模中放入雪櫃雪最少6小時. 雪凍後用篩將可可粉平均篩在餅面上.
Tips 貼士: -
1. 餅碎可用Oreo朱古力餅碎, 配合朱古力慕斯顏色.
2. 每加一樣材料, 要完全拌勻好後才加另一樣. 3. 淡忌廉最好打至6成(有紋有軟勾), 慕斯才會細滑.
4. 熱朱古力奶撞入蛋黃中要不斷拌勻, 不要讓蛋黃受熱凝固起粒.
5. 要確保魚膠粉完全溶解入水中., 要確保魚膠水完全拌勻入慕斯糊中, 否則魚膠水會凝固出現魚膠粒.
6. 脫模時可用熱毛巾包圍模邊, 或用風筒沿模邊吹, 使外層慕斯略溶, 方便脫模.
呢個改良版好掂!! 同事食過都大比10個LIKE我
有個同事仲跟我呢個食譜整左個蛋糕添~~ 小妹好開心呢~~~
