特濃朱古力慕斯凍餅 chocolate mousse cake (附食譜)

自小已經好錫可愛姨甥女, 唔經唔覺, 呢位小妹妹已經十歲女~~

 

可愛姨甥女好為食, 不過佢好得意, 佢唔鐘意食蛋糕... 上星期佢生日, 特別要小妹為佢做一個無蛋糕既生日蛋糕, 仲要指定要朱古力味!!

 

小妹未整過朱古力慕斯凍餅, 返到屋企即刻上網搵食譜, 幸運地, 小妹搵到一個簡單食譜!!  (嗚謝: http://hk.myblog.yahoo.com/jw!yHmn1peXFRsdqBRN6N8XUxs-/article?mid=1171)

 

 

特濃朱古力慕斯凍餅 6”

 

餅底: -

消化餅碎        70g

無鹽牛油        35g

 

慕斯: -

蛋黃                        2隻

朱古力奶                50毫升

可可粉                    5g (約一茶匙)

糖                            10g

淡忌廉                    200g

魚膠粉                    6g

凍開水                    50g (約3湯匙)

55%濃度朱古力     100g

 

裝飾: -

可可粉                     適量

 

做法: -

1. 將牛油用熱水坐溶, 倒入消化餅碎攪拌, 平均放入餅模內, 用匙羹將餅碎壓實放入雪櫃備用.

2. 淡忌廉打至6成後放入雪櫃備用.

3. 55%濃度朱古力用熱水坐溶; 魚膠粉與水開勻後用熱水坐溶.

4. 朱古力奶加糖和可可粉慢火煮至溶解, 撞入已拂勻蛋黃中. (分2-3次加入, 拌勻).

5. 加入魚膠水 (分2-3次加入, 拌勻), 用篩將混合物過濾, 再加入朱古力漿拌勻.

6. 然後與淡忌廉拌勻.

7. 將慕斯漿倒入餅模中放入雪櫃雪最少6小時.  雪凍後用篩將可可粉平均篩在餅面上.

 Tips 貼士: -

1. 餅碎可用Oreo朱古力餅碎, 配合朱古力慕斯顏色.

2. 每加一樣材料, 要完全拌勻好後才加另一樣.  3. 淡忌廉最好打至6成(有紋有軟勾), 慕斯才會細滑.

4. 熱朱古力奶撞入蛋黃中要不斷拌勻, 不要讓蛋黃受熱凝固起粒.

5. 要確保魚膠粉完全溶解入水中., 要確保魚膠水完全拌勻入慕斯糊中, 否則魚膠水會凝固出現魚膠粒.

6. 脫模時可用熱毛巾包圍模邊, 或用風筒沿模邊吹, 使外層慕斯略溶, 方便脫模.

 

 

個mousse cake好香濃朱古力味, mousse夠幼滑!! 我用左Oreo做餅底, 不過按呢個份量 (消化餅碎 70g, 無鹽牛油 35g) 做出黎既餅底太實, 一定要改善吓!!

 

睇吓, 可愛姨甥女見到呢個蛋糕幾開心, 見到咁, 我呢個呀姨都好開心呢~~ 再祝可愛姨甥女生日快樂, 永遠健健康康, 快快樂樂!!