除夕美食

31/12/10, 一早起身準備除夕PARTY美食!

 

先整朱古力脆脆, 放上呢個咁靚既盤上面, 好有high tea feel 呀, 哈哈~~

(做法超簡單, 先熱溶朱古力, 然後mix埋脆脆入面, 雪凍就攪掂!)

 

香草焗雞槌

(早兩日已經醃定雞槌, 用牛油炒香香草同鹽, 然後平均咁掃勻雞槌

 預熱焗爐200度, 每邊焗15分鐘, 之後掃上蜜糖, 將每邊焗10分鐘, done!!

  用錫紙包好雞槌, 方便客人, 我真係好細心呀, 哈哈哈哈~~~)

 

韓式牛仔骨

(將大量薑粒, 蒜粒, 乾蔥粒, 另加豉油, 糖同燒酒略醃牛仔骨,

 先煎香兩邊牛仔骨, 然後放入所有醃料, 收乾汁就攪掂,

 唔使15分鐘做好, 超方便又好食!!)

 

 

海鮮焗扇貝

(做法都好簡單, 扇貝起肉, 將扇貝殼洗乾淨備用,

 炒香洋蔥粒, 然後加入扇貝肉粒, 蟹肉及磨菇粒, 加鹽調味!

 另打散一隻雞蛋, mix以上材料後放入扇貝殼內, 灑上麵包糠,

 放入180度焗爐, 焗15分鐘便可!)

 

招牌白汁大蝦意粉

(小妹既得意之作, 做法簡單又包好味道 ^__^

 先用少少鹽同胡椒粉醃好大蝦,

 炒香洋蔥粒, 煙肉同磨菇粒, 放入大蝦煮熟後, 加入淡忌廉, 加鹽調味後,

 放入意粉, 攪掂!!)

 

酥皮忌廉湯

(先煲好磨菇忌廉湯, 放入碗內 <6-7成滿>,

 碗邊掃上牛油溶液後, 放上酥皮, 輕輕按壓在碗邊上,

  酥皮面掃上蛋黃漿, 放入200度焗爐焗15分鐘, 又攪掂!)

 

以上美食雖然做法簡單, 不過足以令我花上一日時間去準備, 見屋企人同mpp食得開心, 嘜都值得啦, 哈哈~~

 

大食會上, 仲有靚靚二家姐準備既美食:

有勁豐富既雜果沙律!

 

有mpp喜愛既啫喱糖!

 

同埋有家姐第一次整既桂花糕!!

 

 

2009同2010年, 為mpp同屋企人做左兩年除夕大食會.... 2011年既除夕應該會暫停, 因為今年除夕係小妹同mpp新婚後既第一日除夕, 應該到時會同老公仔一齊過, 感覺應該會浪漫d, 嘻嘻~~