Test

2009年2月9日星期一

呀蘇靚湯 - 木瓜雪耳湯

大家千其唔好誤會, 呀蘇靚湯個"呀蘇"唔係蘇絲黃, 係我 - 蘇兒呀! 哈哈~~

星期六, 為左配合呢個濃情二月, 小妹特登煲左"木瓜雪耳湯", 呢個咁滋潤既湯水, 緊係煲比我個honey mpp飲啦! (呢個湯水都幾特別, 用差唔多相同既材料, 煲成湯又得, 煲成糖水都得!!)

材料好簡單:

木瓜一個

雪耳 (小妹用左兩大朵, 因為我勁鐘意食雪耳)

西施骨

南北杏, 蜜棗適量 (小妹想甜少少, 所以加埋龍眼肉, so sweet!)

** 小貼士: 雪耳都幾污糟gar, 所以記得要浸洗多幾次, 之後去除個心硬個d部份......... 另外, 雪耳有兩種 - 硬雪耳同 "林"雪耳, 隨個人歡喜... 小妹鐘意食"林"雪耳, 只需在最後大概半個鐘放入湯內煲就ok! 但如果用硬雪耳, 就要煲耐d喇!!

三個鐘後..... 老火靚湯出場 (由於個木瓜太生, 所以個木瓜顏色無咁橙色, 不過一樣咁好味呢.....哈哈~~ )

P.S.: 今次誤買左個勁生既木瓜, 初時都驚驚地會影響啖湯個味道, 最後當然 so good 啦, hee~~~

切粒後有d哈密瓜feel喎, 哈哈~~

同場加映, 係街市見到呢個菠蘿, 為食既我忍唔住買左兩個返屋企, 實行一味兩吃!!

第一吃, 當然係普通浸鹽水黎吃啦!

第二吃, 我將佢切片, 再用保鮮紙包好放入冰格, 嘩~ 爽呀!!

2009年2月8日星期日

元宵佳節

今日係元宵節, 祝:

- 拍緊拖既朋友(包括我... 哈哈), 有情人終成眷屬!!

- 已婚既朋友, 緊係夫妻和睦啦!!

- 未有對象既, 咁就早日搵到另一半啦!!

小妹係過去呢幾日勁開心, 係會心微笑個隻, 真係講不出聲咁....甜!!!

上星期五, 小妹好sharp咁係六點即閃, 第一原因緊係約左mpp啦.... 第二原因係我地決定下個月去日本玩, 所以急住去旅行社比錢! 真係未出發先興奮呀!!!!!

攪完都成七點幾.... mpp打算去板長or板前食壽司, 所以兩間都攞定飛, 點知等左差唔多半個鐘, 都係叫左三兩個number..... 勁肚餓咁我都係有d不耐煩......

好在有個臨危不亂既mpp係身邊, 佢見唔對路就建議返屋企附近個間日本餐廳食飯, 小妹緊係舉腳贊成啦!!

個晚攪到成八點幾先開餐.... 查實小妹之前約好mpp去加太賀食, 慶祝佢升職之喜, 好可惜小妹上兩個禮拜又發顛, 所以取消左個celebration...... 今次cheap cheap地請mpp, 大方既mpp當然no problem啦! (哈哈, 我又擦鞋喇, 呵呵~~)

玉子壽司 -- mpp"飛佛"

咁生既壽司, 當然又係mpp食gar啦!

珍寶三文魚 -- 痴線gar, 大舊到要用刀叉黎食, 不過好好味呀!!

(promote價: $45有五大舊, 超抵!)

9吋長三文魚壽司, 好味!

又係豬軟骨飯, 百食不厭!

天婦羅炸蝦壽司, 今次好似炸得麻麻, 有待改善!

炸蟹捧壽司, "依之捧"呀, 小妹必食!

最後當然有我既至愛"鹽燒三文魚鮫", 不過個碟一上檯, 我就顧住食, 唔記得左影相....

總共食左八樣野, 埋單都係二百一蚊, 真係超抵又好食!!

2009年2月5日星期四

掃街

擒日, 同事"崖上的小波記"話想食辣魚蛋, 就係咁, 我地去左銅鑼灣掃街....

由於小妹有事相求"崖上的小波記", 擒晚小妹自然做boss請客... 哈哈~~

掃街 (第一擋@唔好食)

mzz: 燒賣 ($5五粒好抵食, 不過唔夠熱, 麻麻地....)

波記: 辣魚蛋 (又係$5, 波記話唔好食, 話d魚蛋既辣味唔夠喎....可能因為d辣汁同魚蛋係分開煮... )

mzz+波記: 椒鹽魷魚鬚 ($10六條, 魷魚鬚太梗, 唔好食....)

掃街 (第二擋@好好食)

食完第一擋唔夠喉, 我地轉食第二擋...

mzz: 煎釀三寶 ($6四件, 呢擋好食好多.... 哈哈)

波記: 炸大腸 ($8四件, 小妹偷食一舊, 嘩~~ 炸得好香脆呢, 好味!)

小妹係名符其實既"燒賣怪".... 真係唔知點解, 總係覺得燒賣好好食... (小妹今朝早餐都係食燒賣, 嘻嘻....)

掃街咁耐以黎, 食過最騎呢又唔好食既野, 應該係花園街食個串魚皮餃... 小妹本身勁鐘意食魚皮餃, 但個串魚皮餃完全唔掂, 因為佢用蒸燒賣既方法黎蒸魚皮餃.... 簡直side哂!!!!

香港地好多度地方都有街頭小食, 但食黎食去, 總係覺得旺角最正最好味.!!

2009年2月4日星期三

奇幻逆緣 (The Curious Case of Benjamin Button)

擒晚同mpp去左睇"奇幻逆緣", 好細膩既一套電影!!!

同事一早已高度讚揚過呢套戲, 成套戲既內容係一個患有衰老症既bb, 一出世就有齊老人家各項既衰退病, 之後不斷成長, 男主角Brad Pitt就不斷年青, 最後當然變成一個bb.....

小妹一邊睇, 心入面就一路叫"唔好", 特別係當Brad Pitt同女主角安祖蓮娜一齊之後, 真係好唔希望佢會變得越黎越後生.... 相信在場每一個人都會感受到女主角心入面個份痛.....眼淺既我, 在中尾段已低頭流淚...... 實在太感人喇....

呢套戲好睇在於....

- 故事 - 交待得清清楚楚打從Brad Pitt bb出世至死...回望一生佢既一生....

- 時光倒流 - 由現代憶述194X年起所發生既事.... 又有當女主角遇上車禍時, 又有一d倒敘.... 唔錯! 唔錯!!

- 片長 - 超過兩個半鐘, 但故事鋪排好好, 完全唔覺有悶場!

- 感人- 實在太多感人位..... 大家入場一定要準備紙巾!

- 一讚 - 由年老到年青, 又由年青到老, 化妝特技一流!! 變回青年時, 面上又長有青春荳, 又有女主角變老時, 身上滿有鬆弛既肉..... 可見導演都每個細節都好details.

- 精彩對白: Good night Benjamin! Good night Dasiy! (so so so sweet!!! )

- 感想 - 生老病死, 係人生必經階段!! 生命既意義唔在於擁有多少, 而在於我地可能體驗多少...... 珍惜每個moment, 珍惜身邊既人!!!

<-- 幾歲學行look

<- 十"靚"歲look

<-- 廿"靚"歲look

<-- 四十幾歲look

2009年2月3日星期二

又唱k

擒晚又去左CEO唱k, 好開心既一個晚上....

一向鐘意唱歌既我, 高峰時試過個個星期都去唱至少一兩場k, 唱到自己窮之外, 仲同"加州窮"d員工都friend埋, 佢地成日任我任飲, 又送小食比我 (小妹過份到連小食都拎返屋企食, 嘻嘻....)! 小妹仲試過唱個lunch k由一點唱到六點 <<註: lunch k只可唱2-3hrs MAX.>>...... 個時唱k真係好瘋癲!

唔記得由幾時開始, 小妹可能無嘜唱k, 突然覺得自己勁唔夠氣唱, 就連把聲都變左小小.... (真gar, 連同事"親愛的"都係咁講.....), 所以, 呢排去親唱k, 一般都係聽人唱多過自己唱.... 好傷心呢.....

擒晚小妹終於返黎喇!!! 我好似開籠雀咁, 唱左成晚都仲頂得住, 真係好盡慶呢!!!!!!! yeah~~~~ 相反, 同事"親愛的"擒晚好似比我傳染左, 佢唱到中斷已經無嘜氣...... oooooooo sorry呀, 哈哈~~

而家CEO做緊promotion, 全單有7折, 每人唔使$160, 有得食又有得唱, 超抵呀!!

BTW, 睇blog知道今日係立春, 立春意思係一年四季既開始! 希望由今日起, 大家都有一個新開始, 新景象!! 仲有呀, 我個五號仔快d升番呀, 好肉"尺"呀.....

2009年2月2日星期一

又攪花臣....

小妹呢期又攪攪新花臣.....

今次係趁新年新間, 種吓一d有意思既植物.... 由於未知呢盆植物會唔會成功, 小妹先賣個關子..... 發芽後再匯報比大家知!!

呢盆植物好環保gar...

- 玻璃杯 --> 本來係杯蠟 (公司做錯辨既sample), 只需將蠟刮出, 便可循環再用!

- 種子 --> 一種生果既核 (嘻嘻... 小妹真係好慳家呢....

)

冷知識:

- 同事"崖上的小波記"話比我知, 原來只需放入洗潔精水入個杯蠟內, 裡面既蠟燭會自動同個杯分離..... 好神奇呀!!!!

<<呢個知識係"崖上的小波記"八番黎, 小妹未試過, 不過, 如果大家咁啱有需要既話, 不妨試試.....可信度應該有95%, 哈哈..... >>

2009年2月1日星期日

mpp牛年大發雄威, 停不了既麻雀戰, 停不了既財源滾滾來!!! 係星期五mpp又嬴大錢喇.... 好強勁!!! mpp係新年暫時嬴成起埋七千大元, 而個傻佬仲分左超過四千蚊比我, 真乖仔!! 唯一有dd可惜係佢擒日陪我屋企人賭馬時輸錢... (小妹都係第一次見mpp賭馬.... 男人賭馬個look一d都唔charm.... 不過佢陪我屋企人一齊玩就無所謂啦!) 統計mpp仍然係牛年大旺!!!!! yeah!!!!

星期六晚約埋家姐呀哥一齊去唱K, 哥哥係新年期間去左北京"反", 佢既手信居然係..... 北京填鴨一隻!! 無錯, 真係一隻鴨... 呢隻仲要係一隻雪藏鴨..... 哥哥話要放入冰箱, 食個時放入微波爐入面叮一叮就食得...... 小妹真係唔知呢隻duck究竟得唔得, 因為小妹對大陸食品有所保留...... >.<

星期日朝早同mpp一齊返教會後, 即刻趕返屋企, 因為屋企人黎我度拜年.... 由於靚女媽咪好鐘意食我樓下個間齋鋪, 小妹緊係盡地主之誼請食飯啦....

之後我地轉移陣地, 去埋家姐度拜年, 夜晚姐夫就車左我地去"三姐"度食飯! 菜式多, 但價錢平, 12個人只係食左千九蚊, 好抵食!! 值得一試!!

http://ol.mingpao.com/cfm/Archive1.cfm?File=20080125/prc01/waa1.txt

地址：將軍澳田下灣村 34 號地下
電話： 27013136
營業時間： 10:30am-12:30am
收費：只收現金，不設加一。
交通：坑口地鐵站 B1 出口，步行約 10 分鐘。 <<小妹覺得最好揸車或者搭的士入去會好d>>
泊車：村內有免費公眾停車場。