星期日一早, 約埋靚靚二家姐陪我同mpp去法國婚紗(FB)試衫!
由於一早上網已經選好哂d衫, 去到FB比單職員後, 好快就可以開始試衫!
緊張派既我, 一早已經remind家姐同mpp, 當小妹著婚紗出黎時, 一定唔準笑我肥..... (小妹既自專心超級薄弱.... 
著上婚紗既一刻, 真真正正感受到自己係新娘子.... 我知道"幸福"已經係我身邊!!
法國婚紗個女職員都算唔錯, 除左我預早選好既衫外, 佢仲搵多幾件唔同style既婚紛同晚裝比我試!!
當小妹做完model比家姐同mpp點評後... 就到mpp show time! mpp選左兩套燕尾服, 一黑一白, mpp著上燕尾服好靚仔呀(係我心目中! 
我同mpp都好怕煩, 所以我地係法國婚紗order埋影相個日所用既花球! 雖然價錢會比外面貴d, 不過我地可以煩少樣野!
呢個花球既顏色好sharp, 拍出黎既效果應該會好靚!
三月中就會影相, 希望當日天公造美, 同埋希望我地預早book既攝影師同化妝師可以得閒幫我地啦!!!
星期六day off... 靚靚家姐陪左我去試妝!
機緣下認識一位好評如潮既新娘化妝師MUA, 好鐘意既佢態度同技巧, 試左成兩個幾鐘後.. 當時既感覺係個妝好出同好sharp... 不過, 睇番d相後, 覺得個妝可以再濃多d!!
正如個MUA所講, 當日既試妝, 係試佢既手勢, 妝同髮型都可以改.... 當小妹選好婚紗同晚裝既服式後, 會再留意其他新娘既髮型, 係結婚前, 會再同MUA研究當日既妝同髮型!
post番當日既其中一個look.... 呢個係著掛look!!! 化妝後, 小妹不禁唔知醜咁講左一句.... "我個樣有d似楊怡"... 當然.... 我梗係無楊怡咁靚啦!!!
近日所感受既喜悅係前所未有既! 呢篇卜好想講吓朋友仔......
小妹既朋友真係唔多, 承認自己係個超級重色輕友既人!! 平時好少同朋友聯絡, 但好感動個個朋友對我都好好, 好關心我!
打從十二月入醫院既一刻, 好朋友既每一個電話問侯, facebook上既留言.... 以及同朋友傾電話時我先知道原來有好多朋友一直都有睇我呢個小小既blog..... 得到你地既關注, 真係令我好感動!
當朋友們知道我要同mpp結婚後, 大家送上既祝賀更令我感動! 早兩個月搵左三個舊同事, 多謝你地義不容辭答應做我既伴娘同姊妹!
舊助手(就稱呼你做"傻妹妹"啦), "傻妹妹"係我同mpp既小天使. 見證住我同mpp既相識, 相戀, 直至開心結果, 好多謝你無時無刻對我地既祝福!!
新/舊朋友, 以及新/舊同事.... 你地既祝賀同關心, 令我感到好窩心! 小妹呢一刻真正感到好"富足", 多謝你地!! 
經過一輪挑選後, 擒日同mpp又去左金都, book左一間信譽唔錯既婚禮攝錄公司, 好開心又攪掂一件事!
由mpp上年十月求婚後, 我地一步一步咁去相議我地個婚禮形式.... mpp呢個大男人好有原則, 話一就一!! 佢一心只想攪個簡單婚禮, 不過, 好感動呢個人大男人為左我呢個小女人, 一步一步咁讓步, 目的好簡單, 我知佢想我開心!
擒晚睇電視, 訪問d夫婦同情侶, 其中楊卓娜同佢老公唱既一首杜麗莎既歌"眉頭不再猛皺"好令我感覺!
歌詞真係好觸動到我..... 未識mpp前, 我個天空係灰色既, 流過無數既眼淚!! 今日, 有mpp係我身邊, 而家每日我個天空都係晴天, 我覺得自己好幸福, 好快樂!! 永遠愛我個mpp, 好好準備做個幸福林太太!!
＊我記得呢個地球 最初只似石頭
冷冷清清 像雪山舖了一片石油
至到你現身 偷取我心
眉頭今天不再猛皺
我記得初次聚頭 雨中一起漫遊
你太緊張 又怕醜 好似一塊木頭
到你夠大膽 輕拖我手
沿途風雨溫暖像被窩
有你對我好 我感到我重要
傻傻呆望你 亦感到輕飄
見你我心裡就甜 每天心笑夢甜
世界美好 像個波蹦跳蹦跳路前
有了你在心 趕走我憂
眉頭今天不再猛皺
重唱 ＊
眉頭今天不再猛皺
擒日正月十五, 元宵佳節, 同以往一樣, 都係同mpp一齊! 不過, 今年有別於往年.... 今年多左一個人.... 就係auntie !
mpp媽媽好好, 煮左好多餸等我地放工番去食.... 而且仲有元宵必備既湯丸添! 小妹唔會只係食野唔做野, 我既職責係負責洗碗
除左我擒日突然變成三人行之外, 可愛助手都係!! 皆因 ................................... 皆因........................................ 皆因 ................................... 皆因....................................... 皆因呢位小妹妹有喜呀!! 真係恭喜!! 恭喜!!!
有左四個月既可愛助手, 午睡時比我偷影左張相!!
家下佢成個小露寶咁! 個身圓碌碌.............個肚脹book book..... 好可愛!!
不過, 可愛小助手由年頭咳到而家都未好番, 希望佢快快好番啦!!
上星期日, 同mpp四出睇酒樓!
我地結婚唔擺酒, 雖則只係book房擺幾圍屋企人食飯!! 但誰不知好多酒樓已經比人一早book哂 ....
睇左好幾個地點, 感恩感恩, 最後我地都book到一間唔錯既酒樓! 場地都幾靚, 而且就腳!! 最開心係哥哥有相熟既朋友, 我地連訂都唔使比!! 
行商場期間, 無意中比我見到呢對Monchhichi花車公仔, 三十週年版既結婚公仔, 可惜對公仔太細, 出黎效果一d都唔靚...... 實在買唔落手!!
之前鐘意既Bebichhihi, 雖然對公仔好靚, 但無奈見過其他blogger放係車上既相, 佢既size比上面對Monchhichi仲細....... 真係唔好睇!
至於呢對Monchhichi, size會大個d!! 好喜歡男仔既服飾, 但唔多like女仔既婚紗, 套婚紗超級娘爆!! 煩惱+ing >.<
