又一朱古力慕斯凍餅 (8" chocolate mousse cake ) -- 附食譜

早兩日又做左個 朱古力慕斯凍餅, 今次已經係第三次整!

已經第三次做呢款蛋糕, 理應毫無難度!!  但幣就幣在... 今次係要做比mpp個舊同事... 仲要係for14人食....  唔想mpp無face... 又要將做開6吋改為8吋... 分量唔同, 加上自己比左好大壓力自己... 小妹確實唔係好滿意個蛋糕!!


個mousse唔夠滑.... 蛋糕甜左d.... 塊牌整得唔靚... 士多啤梨唔夠乾身, 上唔到糖廂..... 真係有d唔開心!!

好在... mpp d 舊同事好比面, 係小妹面前讚個蛋糕好味道...  anyways, 下次會加倍努力!!

係度再祝mpp個靚靚同事 happy birthday!!

特濃朱古力慕斯凍餅 8”

 

餅底: -

Oreo朱古力餅碎  140g

無鹽牛油    70g

 

慕斯: -

蛋黃     4隻

朱古力奶     100毫升

可可粉     10g

糖     20g

淡忌廉 400g

魚膠粉     12g

凍開水     100g

55%濃度朱古力 200g

 

裝飾: -

可可粉 適量

 

做法: -

1. 將牛油用熱水坐溶, 倒入Oreo朱古力餅碎攪拌, 平均放入餅模內, 用匙羹將餅碎壓實放入雪櫃備用.

2. 淡忌廉打至6成後放入雪櫃備用.

3. 55%濃度朱古力用熱水坐溶; 魚膠粉與水開勻後用熱水坐溶.

4. 朱古力奶加糖和可可粉慢火煮至溶解, 撞入已拂勻蛋黃中. (分2-3次加入, 拌勻).

5. 加入魚膠水 (分2-3次加入, 拌勻), 用篩將混合物過濾, 再加入朱古力漿拌勻.

6. 然後與淡忌廉拌勻.

7. 將慕斯漿倒入餅模中放入雪櫃雪最少6小時.  雪凍後用篩將可可粉平均篩在餅面上.

 Tips 貼士: -

1. 餅碎可用消化餅碎

2. 每加一樣材料, 要完全拌勻好後才加另一樣. 

3. 淡忌廉最好打至6成(有紋有軟勾), 慕斯才會細滑.

4. 熱朱古力奶撞入蛋黃中要不斷拌勻, 不要讓蛋黃受熱凝固起粒.

5. 要確保魚膠粉完全溶解入水中., 要確保魚膠水完全拌勻入慕斯糊中, 否則魚膠水會凝固出現魚膠粒.

6. 脫模時可用熱毛巾包圍模邊, 或用風筒沿模邊吹, 使外層慕斯略溶, 方便脫模.